Тим од 8 пожарникари на ДПД Свети Николе, како дел од државниот Модул на тимовите за брз одговор на Дирекцијата за заштита и спасување (ДЗС), веќе четврти ден е ангажиран на екстремен терен на подрачјето на општина Македонски Брод, каде активно учествува во локализирањето на големиот пожар.
Во услови на високи температури, тежок пристап, чад, ветер и постојан ризик од ширење на огнот, нашите доброволни пожарникари заедно со останатите сили на системот за заштита и спасување работат на терен со цел заштита на населението, имотите и природните богатства.
Оваа интервенција уште еднаш ја покажува суштинската улога на доброволните противпожарни друштва во справувањето со шумски пожари и пожари на отворен простор. Кога теренот е најтежок, кога деновите се долги, а ризикот е постојан, доброволните пожарникари се таму каде што заедницата најмногу има потреба од нив.
ДПД Свети Николе продолжува да делува посветено, дисциплинирано и организирано, со јасна мисија: заштита на граѓаните, имотите, шумите и природата. Благодарност до сите пожарникари, спасители, институции и служби кои се дел од оваа сложена и исклучително важна интервенција.
Храброста, солидарноста и пожртвуваноста на терен се нашата најсилна порака.


